دڵگیر ڕواندزی، شاعیرێکی ون, یاسین برایم
لەم نووسینە، گەڕان و پشکنین بەدوای کەسایەتییێکی ونی ڕواندز دەکەین؛ لەسەدی بیستەم، دەستی لە نووسین هەبووە، شیعری نووسیوە، دەبێ ئەم شاعیرە کێ بێت؟ لە گۆڤاری گەلاوێژ، ژمارە(۹_١٠)، ئەیلوول و تشرینی یەکەمی ١٩٤٢. شیعرێکی ناسک و جوانی بەناوی (دایک و کوڕ)ی تێدایە، نێزیکەی(٨٢) ساڵ بەر لە ئێستا. دەمەتەقێی نێوان دایک و منداڵێکی کوڕی کوردە. وێنەیێکی جوانی کوردانەی تێدایە، شیعرەکە، پێنج دێرە و دە بڕگەیە. وشەی کوردی پەتییە و دوور لەوشەی بێگانە. پرسیارەکەی من ئەوەیە، دەبێ ئەو شاعیرە ڕواندزییە، کێ بێت بەو ناوە جوانە. دەبێ باپیری کام لە ئێمە بێت و لەوسەردەمە بەو زمانە پاراوە، ئەو شیعرەی نووسیوە، دەبێ چەندان شیعری دێ هەبووبێت. ڕەنگە تەمەنی بۆ سەرەتایی سەدەی بیستەم بگەڕێتەوە. پێدەچێت تا ساڵی پەنجاکان و شەستەکان ژیابێت. لە تەنیش ناوەکەی خوشی، بەغدا نووسراوە، ئایا لەو شارە ژیاوە و فەرمانبەربووە، یان شیعرەکەی لەوێ نووسیوە. بێگومان ناوی (عەلی، عەبدوڵڵا، عەبدولڕەحمان، عەبدولقادر…هتد. هەر ناوێکی دی بە پیتی (ع) دەستی پێکردبێت. دوای بەدواداچوون و پشکنینێکی وردی ڕۆژنامە و گۆڤارەکان، پێش ئەم ساڵە و تا ساڵی١٩٥٨ چ بەرهەمێکی ئەو شاعیرە نابینین. بەڵام وەنەبێ بێهیوابین، سەرە داوێکمان لەدەستە، لەئایندە لەگەڵ چەند شاعیرێ دیکەی ڕواندز، دەیانناسینم. من لەم نووسینە، دەمەوێت لە ڕێگەی خوێنەران و ڕۆشنبیرانی ڕواندز، زانیاری ڕاست و تەواوم دەستکەوێت. ڕاوبۆچوونی خۆم پشتڕاست بکەمەوە. بۆیە ئێوەی خوێنەرش، دەبنە تەواوکەری ئەم نووسینە. یاسین برایم
دایک و کوڕ
دایک : بۆچی خەوت نایە ڕۆڵەی شیرینم
شەوگار درەنگە، سەرکە سەرینم
کوڕ : تۆ چی ئەزانی داخم لە دڵایە
شەو خەوم نایە، بێ لایلایە
دایک: ڕۆڵەم تێر شیری ئاخر بۆچی ئەگری
خوا بە منی داوی، کەی تۆ پێ ئەگری
کوڕ: لەشەو بێزارم دەردی گرانە
چاوەڕێی ڕۆژم، ڕۆژ هی کوردانە
دایک: مژدە بێ ڕۆڵە وا باز گەردانە
تۆش وەک براکەت، هەسته مەردانە
ع. ش(دڵگیر ڕواندزی)، بەغدا .
ت.شیعرەکەم بە ڕێنووسی ئێستا نووسیوە.
